ایکی آلما

ایکی آلما نویسنده: میرزه جلیل قولوزاده داستان کوتاه ترکی یازیچی: میرزه جلیل قولوزاده تورکجه قیسا حکایه متن داستان: ایکی آلما آخشام واخت‌لاری گزمه‌یه چیخاندا، هردن بیر، بالاجا اوغلومو دا یانیمجا آپاریرام. بو دفعه ده آپاردیم. و هامان بالاجا اوغلوم ایله گزمه‌یه گئدنده هردن بیر اتفاق دوشور کی، اونا یئمه‌لی شئی ده آلیرام کی، مندن راضی قالسین. بو دفعه ده بالاجا اوغلوم دوکان‌لاردا دوزولموش نازونعمتی گورنده مندن یئمه‌لی بیر شئی ایسته‌دی. من او عقیده‌ده دئییلم کی، هر دفعه اوشاقلا بازارا گئدنده اونا بیر شئی آلماق لازمدیر و لاکن بونو دا دئمیرم کی، هئچ بیر واخت آلماق لازم دئییل. آنجاق بو دفعه هئچ بیر زاد آلماق ایسته‌میردیم. او سَبَبه کی، جیبیمده چوخ پولوم یوخ ایدی. و بیر ده ایسته‌میردیم کی، اوشاغیم هر دفعه بازارا چیخاندا دادامال اویرنسین. بیر قَدَر دولاندیق، سونرا یولوموز دریا کَنارینا دوشدو. آمما اوغلومو دا بی‌داماغ گوروردوم. چون تربییه اوز قایداسینجا، اوشاغین اوز تربیتی، بو دا اوز قایداسینجا. و اونونچون چوخ دا عناد ائتمه‌مک بابتیندن دریا کناریندا تاباقا دوزولموش مئیوه‌لردن ایکی شاهییا ایکی دنه یاخشی قیرمیزی آلما آلدیم و ایکیسینی ده وئردیم اوغلوما. هرچند اوغلوم آلمالاری مندن آلدی، آمما گوردوم کی کونول‌سوز آلدی. من اوندان بی‌داماغلیقی‌نین سببینی سوروشمادیم. چونکی سببی آشکار ایدی. بازاردا بیراز بوندان قاباق او مندن ایکی شئی ایسته‌دی، هئچ بیرینی آلمادیم. بیر جارجو قووونو ایسته‌دی، آلمادیم، سونرا دا نئمسه قنادی دوکانی‌نین قاباغیندان کئچنده شوشه‌نین دالینا دوزولموش رنگارنگ کونفِت و شیرینیاتدان ایسته‌دی، آلمادیم. اوغلوم او درجه‌ده مندن ناراضی ایمیش کی، من آلمالاری اونا وئرندن سونرا دا گئنه بیر سوز دانیشماق ایسته‌مه‌دی و من اونا وئردیییم سوال‌لارا دا چوخ مئیل‌سیز جاواب وئردی. دَخی اونو بئله قاش‌قاباقلی گورنده من اوزوم ده بی‌داماغ اولدوم و آذرنئفت ایداره‌سی‌نین قاباغیندا دوران تراموای واگن‌لاری‌نین بیرینه اوغلومو قالخیزدیم و اوزوم ده میندیم کی، گَلَک ائویمیزه. واگن‌دا هله بیزیم ایکیمیزدن باشقا هئچ کس یوخ ایدی. اوغلوم بویدا بیر یتیم روس اوشاغی جیر-جیندیر ایچینده، اوز گوزو قاپ-قارا، چیرکلی و اییرَنج، گلدی دوردو قاباغیمیزدا و مندن بیر قَپیک پول ایسته‌دی. جیبیمده آنجاق بیر عابباسی گوموش پول وار ایدی. من اوشاغا بیر سوز دئمه‌دیم کی، کئچیب گئتسین. بیر نئچه مینیک آرواد و کیشی واگنا گیردیلر و ساغیمیزدا-سولوموزدا یئر توتدولار. بورادا منیم فیکریم گئتدی یتیمه پول وئرمه‌مه‌ییمه و دیلنچی‌یه پول وئرمک لازیمدی یا لازم دئییلمی مساله‌سی منی باشلادی مشغول ائتمه‌یه. هر کس نه دئییر دئسین، آنجاق دیلنچی اوشاغا هئچ بیر شئی وئرمه‌مک منیم خوشوما گلمه‌دی. بورادان اونا اشاره ائتمیرم کی، من هئچ بیر دیلنچی‌یه یوخ دئمه‌رم، چونکی اولا بیلر کی، بیر پارا فیلوسوف‌لارین دیلنچی‌یه پول وئرمک، اونو بدبخت ائتمک صفتی بلکه منه ده سرایت ائدیبدیر. آنجاق سوزون حقیقتی بودور کی، بوگونکو دیلنچی اوشاغا بیر قپیک وئرمه‌مه‌ییم منی بورادا خاراب ائتدی. او سببه خاراب ائتدی کی، هامان دیلنچی اوشاق یاشدا منیم آتالی و آنالی اوغلوم، اَینی-باشی تززه، قارنی توخ، بو ساعات بورادا منیم ساغ طرفیمده مندن اینجیمیش اوتورموشدو کی، نییه من اونا کونفت آلمادیم، آنجاق ایکی آلما آلدیم. واگنوموز حرکت ائدیب گئدنده آکوشکانین شوشه‌سی‌نین دالیندان گوردوم کی، هامان دیلنچی اوشاق یئرده دوروب، بیر قیرمیزی آلمانی آغزینا باسیب گَمیرتله‌ییر. قاباقجا بیر شئی دویمادیم. آمما هامان دقیقه یانیمداکی اوغلومون آلمالاری یادیما دوشدو و چوندوم اوشاغا طرف. اوغلوم گوله-گوله منه یاواشجا بونو دئدی: -دده! آلمانین بیرینی وئردیم دیلنچی اوشاغا. بیر دنه قیرمیزی آلما اوز-اوزلویونده بیر شئی دئییل، اونون قیمتی ایکی قپیکدیر و یئییب قورتولاندان سونرا هئچ بیر شئیدیر. آمما معنوی ایش‌لرده بیر آلمانین دَیَری اولا بیلر چوخ بویوک اولسون. او قَدَر یونگوللوک و کونول خوشلوغو کی، بورادا ایکی قپیکلیک آلمادان منه گلیب چاتدی، نهایت درجه‌ده ایدی. فیلسوفییا عالمینه گلدیک‌ده، غئیری‌لری دیلنچی‌یه کوچه‌ده اعانه وئرمه‌یی نه جور باشا دوشورلر دوشسونلر و اینسانیت متخصص‌لری بو مساله‌نی نه طوور حل ائدیرلر ائتسینلر، آنجاق منیم بیر بالاجا اوغلوم ایکی آلماسی‌نین بیریسینی بیر یتیم اوشاغا وئردی. و اولا بیلر کی، اوغلوم دا یئکه‌لندن سونرا، بیر پارا عالیم‌لرین «کوچه‌ده دیلنچی‌یه اعانه وئرمه‌یینیز» نصیحتینی ائشیدندن سونرا، اونلاری کوچه‌ده گورنده منیم کیمی اوز چونده‌ره‌جکدیر. آنجاق هله کی، ایندی اوغلوم بو ایش‌لری باشا دوشمور و اونونچون دا ایکی آلمانین بیرینی یتیم اوشاغا وئریر.